काठमाडौं, ५ कात्तिक २०८२ –
हिजो काठमाडौंको भृकुटीमण्डपमा सम्पन्न राष्ट्रिय सम्मेलनमा नेपालका वामपन्थी दलहरूले ऐतिहासिक निर्णय गर्दै नयाँ पार्टी गठन गरेका छन्। सम्मेलनमा करिब १० वटा वाम घटक दलहरू एकठाउँ भएर एकीकृत भएका छन् र नयाँ पार्टीको नाम नेपाली कम्युनिस्ट पार्टी राखिएको छ। पार्टीको चुनाव चिन्ह “पाँच कुने तारा” रहने निर्णय पनि भएको छ। एकतामा चिरन पुनको ने.क.पा. , राजु कार्की अध्यक्ष रहेको नेकपा समाजवादी पार्टी , सुवासराज काफ्ले अध्यक्ष रहेको जनसमाजवादी पार्टी नेपाल, महेन्द्रराय यदवको नेपाल समाजवादी पार्टी , माधव कुमार नेपाल अध्यक्ष रहेको ने.क.पा. (एकीकृत समाजवादी) पार्टी, कर्णजित बुढाथोकी अध्यक्ष रहेको ने.क.पा. (माओवादी समाजवादी) पार्ट , प्रेम बहादुर सिंह अध्यक्ष रहेको ने.क.पा. (साम्यवादी) पार्टी र नेकपा (माओवादी) पार्टी विच एकता भएको हो ।
सम्मेलनमा प्रमुख संयोजकको जिम्मेवारी पुष्पकमल दाहाल (प्रचण्ड) लाई दिइएको छ भने सहसंयोजकमा माधवकुमार नेपाल चयन भएका छन्। कार्यक्रममा सहभागी नेताहरूले पार्टी एकता र देशको सामाजिक–आर्थिक विकासका लागि आफ्नो प्रतिबद्धता व्यक्त गरे।
नेता प्रचण्डले सम्मेलनलाई सम्बोधन गर्दै भने, “हामी राष्ट्रको अखण्डता, जनताको अधिकार र लोकतन्त्रको रक्षा गर्न दृढ प्रतिबद्ध छौँ। हामी मृत्युदेखि डराउँदैनौँ र जनताको हितमा काम गर्नेछौँ।” सहसंयोजक माधवकुमार नेपालले पनि सामाजिक न्याय, भ्रष्टाचार विरुद्ध र सुशासनका लागि पार्टीका सदस्यहरूलाई जोडदार आह्वान गरे।
सम्मेलनमा पारित घोषणापत्र अनुसार पार्टीले मार्क्सवाद–लेनिनवादलाई आधार मान्दै नेपालको विशेष परिस्थितिअनुसार वैज्ञानिक समाजवाद लागू गर्ने प्रतिवद्धता जनाएको छ। यसै घोषणापत्रमा भ्रष्टाचार, अन्याय र असमानता अन्त्य गर्ने, महिला, दलित, आदिवासी–जनजाति, अल्पसंख्यक र सीमान्तकृत समुदायको अधिकार सुनिश्चित गर्ने, तथा शिक्षा, स्वास्थ्य र रोजगारीका क्षेत्रमा सुधार ल्याउने प्रतिबद्धता राखिएको छ।
पार्टी एकतामा समावेश भएका प्रमुख दलहरूमा नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी, जनसमाजवादी पार्टी, नेकपा (समाजवादी) लगायतका दलहरू रहेका छन्। यसले वामपन्थी राजनीति पुनः संगठन गर्दै आगामी निर्वाचन र राजनीतिक रणनीतिमा महत्वपूर्ण भूमिका खेल्ने अपेक्षा गरिएको छ।
हालैको राजनीतिक समीकरणमा वामपन्थी दलहरू बारम्बार फुट्ने–जुट्ने अवस्थामा रहँदै आएका थिए।
विश्लेषकहरूले हिजोको पार्टी एकतालाई “वामपन्थी राजनीतिक परिदृश्यमा नयाँ मोड” भनेका छन्। यदि यो एकता सफलतापूर्वक कार्यान्वयनमा जान्छ भने आगामी निर्वाचनमा ठूलो राजनीतिक प्रभाव पार्ने र वाम मोर्चाको शक्ति केन्द्रलाई सुदृढ गर्ने अपेक्षा गरिएको छ।
पार्टी एकताको घोषणापत्रले आगामी दिनमा सामाजिक, आर्थिक र राजनीतिक सुधारका लागि पार्टीको प्राथमिकता र प्रतिबद्धता स्पष्ट पारेको छ। तर, यसको वास्तविक सफलता कार्यान्वयनमा निर्भर रहनेछ। जनता, कार्यकर्ता र दलका सदस्यहरूले कसरी विश्वास र समर्थन देखाउँछन् भन्ने कुराले पार्टीको भविष्य तय गर्ने मुख्य पक्ष हुनेछ।
पार्टी एकताले नेपाली राजनीतिमा नयाँ अध्याय खोल्ने संकेत दिएको छ। आगामी समयमा यसले जनतासँग संवाद, नीति निर्माण र भ्रष्टाचार नियन्त्रणमा कस्तो प्रभाव पार्छ भन्ने दृष्टिले सबैको ध्यान आकर्षित हुने अपेक्षा गरिएको छ। तर नेकपा माओवादीका नेता जर्नादन शर्मा र राम कार्की लगाएत केही नेताले पार्टी एकिकरण स्वीकारेनन् भने ने.क.पा. (एकीकृत समाजवादी) पार्टीकी नेतृ रामकुमारी झाक्री लगाएत केही नेता भने एकतामा आएनन् ।
