काठमाडौं, असोज ३ –
नेपालको संविधान जारी भएको ऐतिहासिक दिनको अवसरमा असोज ३ गते संविधान दिवस २०८२ देशभर भव्य रुपमा मनाइएको छ। राजधानी काठमाडौंदेखि विभिन्न जिल्लासम्म सरकारी तथा गैरसरकारी संस्था, स्थानीय तह, शैक्षिक निकाय र नागरिक समाजको सक्रिय सहभागितामा विविध कार्यक्रम सम्पन्न भएका छन्।
राजधानीमा आयोजित केन्द्रीय समारोहमा राष्ट्रपति, उपराष्ट्रपति, प्रधानमन्त्री, संघीय संसद्का सभामुख–उपसभामुख, मन्त्रीहरू, संवैधानिक निकायका प्रमुख तथा उच्च पदस्थ अधिकारीहरूको विशेष उपस्थितिमा ध्वजारोहण, सम्मान गारद तथा मार्चपास कार्यक्रम सम्पन्न भएको थियो। सो अवसरमा नेपाल प्रहरी, सशस्त्र प्रहरी बल, नेपाली सेना तथा स्काउटका टोलीहरूले राष्ट्रिय ध्वजाको सम्मानमा आकर्षक प्रदर्शन गरेका थिए। साथै, विभिन्न जातजाति र समुदायको सांस्कृतिक झाँकी प्रस्तुत गरिँदा संविधानले अंगीकार गरेको समावेशीता र विविधताको सन्देश प्रकट भएको थियो।
संविधान दिवसको अवसरमा संघीय राजधानीसँगै सातै प्रदेश र ७७ वटै जिल्लामा पनि समान उत्साहका साथ कार्यक्रम मनाइएको छ। सिन्धुलीमा जिल्ला प्रशासन कार्यालय र स्थानीय तहहरूको संयोजनमा र्याली, सचेतना सभा र सांस्कृतिक प्रस्तुतिहरू गरिएको थियो। विद्यालय स्तरमा वक्तृत्वकला, निबन्ध तथा चित्रकला प्रतियोगिता आयोजना गरी विद्यार्थीलाई संविधानको महत्त्वबारे सचेत गराइएको थियो।
रामेछाप जिल्लामा संविधान दिवसको दिन बिहानैदेखि सरकारी कार्यालय, सुरक्षाकर्मीका ब्यारेक र विद्यालयहरूमा ध्वजारोहण गरिएको थियो। नगरपालिकाहरूले आयोजना गरेका औपचारिक सभामा प्रमुख जिल्ला अधिकारी, जनप्रतिनिधि, शिक्षक, विद्यार्थी र सर्वसाधारणको सक्रिय सहभागिता थियो। स्थानीय कलाकारहरूले संविधानले स्थापित गरेका नागरिक अधिकार, समानता र लोकतान्त्रिक अभ्यासलाई उजागर गर्ने गीत–संगीत र नाटक प्रस्तुत गरेका थिए।
सर्लाहीमा पनि संविधान दिवस विशेष रूपमा मनाइएको छ। जिल्ला प्रशासन कार्यालय, जिल्ला प्रहरी कार्यालय तथा विभिन्न विद्यालयहरूले संयुक्त रूपमा सचेतनामूलक ¥याली निकालेका थिए। कार्यक्रमका प्रमुख वक्ताहरूले संविधानले प्रत्येक नागरिकलाई दिएको मौलिक अधिकार, समान अवसर र राष्ट्रिय एकताको महत्वबारे प्रकाश पारेका थिए। गाउँस्तरमा बालबालिकादेखि वृद्धवृद्धासम्मको सहभागितासहित साँझ दीप प्रज्वलन कार्यक्रम पनि गरिएको थियो।
यस्तै, देशका अन्य थुप्रै जिल्लामा पनि संविधान दिवस उल्लासमय वातावरणमा मनाइएको छ। विभिन्न समुदाय र पेशागत संघ–संस्थाले आफ्ना–आफ्ना क्षेत्रमा संविधानप्रति आस्था र प्रतिबद्धता व्यक्त गरेका छन्। नागरिक समाजका प्रतिनिधिहरूले संविधानलाई कार्यान्वयन गर्दै लोकतन्त्रको सुदृढीकरण गर्ने जिम्मेवारी सबैको साझा भएको बताउँदै सचेतनामूलक अपिल गरेका छन्।
संविधान दिवसको अवसरमा मुलुकभर सरकारी कार्यालय, सार्वजनिक संस्थान, शैक्षिक प्रतिष्ठान र नागरिक घरघरमा राष्ट्रिय ध्वजापताका फहराइएको थियो। सार्वजनिक स्थलहरूमा दीप प्रज्वलन र सचेतनामूलक पोस्टर प्रदर्शनसमेत गरिएको छ।
नेपालको संविधान २०७२ साल असोज ३ गते ऐतिहासिक रूपमा जारी भएको थियो। सात दशक लामो राजनीतिक संघर्ष, आन्दोलन र नागरिकको बलिदानपछि मुलुकले संघीय लोकतान्त्रिक गणतन्त्रात्मक संविधान प्राप्त गरेको हो। संविधानले संघीयता, धर्मनिरपेक्षता, गणतन्त्र, समावेशीता र समानतामा आधारित लोकतान्त्रिक मूल्य र प्रणालीलाई संस्थागत गरेको छ। यसले नागरिकका मौलिक हक, महिला, दलित, आदिवासी, मधेसी, मुस्लिम, थारू, पिछडिएको वर्गलगायत सम्पूर्ण समुदायलाई समान अधिकार सुनिश्चित गरेको छ।
संविधान दिवस २०८२ ले मुलुकभर पुनः संविधानको मूल्य र महत्वलाई स्मरण गराउँदै नागरिक एकतालाई थप मजबुत बनाएको छ। यस अवसरमा सर्वसाधारणदेखि उच्च पदस्थ व्यक्तिसम्मको सक्रिय सहभागिता रहेको देखियो। संविधान दिवसका कार्यक्रमले संविधान कार्यान्वयनमा देखिएका चुनौती समाधान गर्दै राष्ट्रिय एकता र लोकतान्त्रिक अभ्यासलाई सबल बनाउने सन्देश दिएको छ।
