२ साउन २०८२, शुक्रबार – सिन्धुली।
नेपाल कम्युनिष्ट पार्टी (एमाले) ले राष्ट्रिय सभाको प्रमुख सचेतकको जिम्मेवारी गोपाल भट्टराईलाई दिएको छ। विहिबार , संघीय मामिला तथा सामान्य प्रशासनमन्त्रीमा नियुक्त भएपछि तत्कालीन प्रमुख सचेतक भगवती न्यौपानेको स्थानमा भट्टराईलाई मनोनीत गरिएको हो।
प्रधानमन्त्री एवं एमाले संसदीय दलका नेता केपी शर्मा ओलीले पार्टीको संघीय संसदीय दलको विधान, २०७७ तथा संघीय संसदका पदाधिकारी र सदस्यहरूको पारिश्रमिक तथा सुविधासम्बन्धी ऐन, २०७३ को आधारमा भट्टराईलाई प्रमुख सचेतकको जिम्मेवारी दिएका हुन्।
भट्टराई हाल लुम्बिनी प्रदेशबाट राष्ट्रिय सभामा प्रतिनिधित्व गरिरहेका छन्। उनी रुपन्देही जिल्लाको तिलोत्तमा नगरपालिकाका स्थायी बासिन्दा हुन्। लामो समयदेखि पार्टी राजनीतिमा सक्रिय भट्टराई एमालेका अनुशासित नेता मानिन्छन्। उनले विभिन्न समयमा पार्टीभित्रका संगठनात्मक जिम्मेवारी पनि सम्हाल्दै आएका छन्।
प्रमुख सचेतकको भूमिका संसदीय अभ्यासमा निकै महत्वपूर्ण मानिन्छ। प्रमुख सचेतकले पार्टीका सांसदहरूलाई संसदमा उपस्थित गराउने, उनीहरूलाई पार्टीको तर्फबाट अभिमुखीकरण गराउने, संसदको कार्यसूचीमा सक्रिय भूमिका निर्वाह गराउने लगायतका कार्यहरू सम्हाल्ने गर्छन्। साथै, संसदमा पार्टीको नीति र धारणा प्रस्तुत गर्न पनि सचेतकहरूको महत्वपूर्ण भूमिका हुने गर्दछ।
एमालेले वर्तमान सन्दर्भमा अनुभवी र संगठनमा सक्रिय नेता भट्टराईलाई प्रमुख सचेतक बनाएर संसदीय अभ्यासलाई थप सुदृढ गर्ने विश्वास लिएको देखिन्छ। मन्त्री बनेपछि पद रिक्त भएकै दिन भट्टराईलाई मनोनयन गरिएको जनाइएको छ, जसले पार्टीको आन्तरिक संरचना चुस्त राख्ने संकेत गर्दछ।
भट्टराईको मनोनयनसँगै राष्ट्रिय सभामा एमालेको संसदीय नेतृत्व अझ सक्रिय र प्रभावकारी हुने अपेक्षा गरिएको छ।
