नेकपा (क्रान्तिकारी माओवादी) का महासचिव मोहन वैद्य ‘किरण’ दीर्घ रोगका कारण उत्पन्न जटिल स्वास्थ्य समस्याले गर्दा त्रिभुवन विश्वविद्यालय शिक्षण अस्पताल (टिचिङ्ग अस्पताल), महाराजगञ्जको सघन उपचार कक्ष (आइसीयू) मा भर्ना गरिएका छन्।
जेठ १५ गतेदेखि उहाँको स्वास्थ्य अवस्था गम्भीर बन्दै गएको जनाइएको छ। अस्पताल स्रोतका अनुसार, उहाँको अक्सिजनको मात्रा स्थिर नरहेकाले चिकित्सकहरूले विशेष निगरानीमा राखेर उपचार गरिरहेका छन्। नियमित परीक्षण तथा अक्सिजन सपोर्टमार्फत उपचार प्रक्रिया जारी छ।
परिवार स्रोतका अनुसार, वैद्यको स्वास्थ्यमा सुधार होस् भन्ने कामना गर्दै पार्टीका शीर्ष नेतादेखि कार्यकर्ता र शुभेच्छुकसम्म चिन्तित छन्। उहाँको स्वास्थ्य अवस्थाबारे जानकारी लिन आएका धेरै नेताहरूले सान्त्वना प्रकट गरेका छन्।
पार्टीको आन्तरिक स्रोतका अनुसार, वैद्यको स्वास्थ्य अवस्था असहज रहेकाले तत्कालीन कार्यसञ्चालनका लागि पार्टीको कार्यवाहक महासचिवको जिम्मेवारी वरिष्ठ नेता सी.पी. गजुरेललाई दिइएको छ।
वैद्यको योगदान र सक्रियताले माओवादी आन्दोलनमा विशेष स्थान ओगटेको भन्दै नेताहरूले चिन्ता प्रकट गरेका छन्। स्वास्थ्य अवस्थामा छिटो सुधार होस् भन्ने कामनासहित विभिन्न पार्टी र समुदायका नेताहरूले सामाजिक सञ्जाल तथा प्रत्यक्ष भेटमार्फत शुभकामना प्रकट गरिरहेका छन्।
यसै क्रममा नेपालका पूर्वप्रधानमन्त्री तथा समाजवादी चिन्तक डा. बाबुराम भट्टराईले शिक्षण अस्पताल पुगेर वैद्यको स्वास्थ्य अवस्थाबारे जानकारी लिएका छन्। उनले वैद्यको शीघ्र स्वास्थ्यलाभको कामना गर्दै राष्ट्रलाई योगदान दिने नेताको दीर्घायु आवश्यक रहेको बताएका छन्।
पार्टीका अन्य नेताहरू, समाजसेवी तथा बौद्धिक व्यक्तित्वहरूले पनि मोहन वैद्यको शीघ्र स्वास्थ्यलाभको कामना गर्दै अस्पताल पुग्ने क्रम जारी छ।
जनस्वास्थ्यको पक्षबाट समेत वरिष्ठ नेताहरूको स्वास्थ्यको ख्याल गर्नु राज्यको पनि दायित्व हो भन्ने आवाज समेत उठ्न थालेको छ।
